Realak 1 eta 2ko garaipena lortu du Club Esportiu Europa bezalako talde historiko baten aurka, jokoaren pisua txuri-urdinek izan duten norgehiagokan.
Donostiarrak baloi jabetza luzeekin izan dira nagusi norgehiagokaren hasieran eta etxekoek ezin izan dute euren jokoa egin. Hala ere, kataluniarrak izan dira markagailua estreinatu dutenak. Natàliak, motz gelditu den korner bat erdiratu, aldaratzea berari erori, eta izugarrizko jaurtiketa egin du Arrularentzako ezinezkoa zen baloi bat jarriz. Gorka Alvarezen taldeak norgehiagoka berdintzeko aukera izan du atsedenaldira joan aurretik, Egigurenen jaurtiketa batekin, baina aurkariaren atezainak gelditu du arazo handirik gabe.
Bigarren zatia hasi eta berehala, etxekoek markagailua handitzeko aukera izan dute, baina Arrulak, buruz buruko duelua irabazi du Vanesa Nuñezen aurka, bere taldea bizirik mantenduz. Geldiketa bikain hori egin eta minutu gutxira, Chaconek berdinketa lortu du eskuin hegaletik area barrura sartu eta jaurtiketa gurutzatu bat baliatuz. Berdinketaren ostean, bi taldeek aurrea hartzeko aukerak izan dituzte, baina azkenean txuri-urdinak izan dira balantza beraien alde jarri eta neurketa irabazi dutenak. Ia geldiezina zen Chaconen jaurtiketa bikain bati esker 1 eta 2koa ezarri dute eta amaierara arte eutsi diote emaitzari.
Garaipen garrantzitsua lortu dute ligako lehen sailkatuaren aurka, datorren astean aldiz, Zubietara itzuliko dira CD Pradejon hartzeko, garaipenaren bidean jarraitzeko helburuarekin.
Fitxa teknikoa:
Club Esportiu Europa: Alba Sánchez, Julia Serrat, Naiara Tarifa, Maria Pilar Porta (Aina Ortiz, min. 87), Silvia Masferrer (Clara De Clemente, min. 65), Natàlia Fernandez (Victoria Flanigan, min. 87), Neus Vila (Vanesa Nuñes, min. 46), Sara Navarro (Carla González, min. 87), Ariadna Marquez, Julia Gómez eta Nuria Benet.
Real Sociedad: Arrula, Etxebeste, Solozabal, Azpirotz, Losada, Santana, Lezeta (Aramburu, min. 89), Chacón (Aranburu, min. 76), Zunzunegi (El Amraoui, min. 61), Egiguren (Echarte, min. 89) eta Arruabarrena (Isasisasmendi, min. 61).
Golak: 1-0: Natàlia Fernandez, min. 36; 1-1: Chacón, min. 51; 1-2: Chacón, min. 70.
Epailea: Monago Del Rio, kanpoko Isasisasmendi eta Lezeta zigortu ditu.