Gure bigarren filiala hiru eta bat nagusitu zaio Izarrari gaur arratsaldean Zubietan. Astiazaranek bi aldiz eta Soroetak penaltiz egindako golek bigarren garaipena jarraian eman die txuri-urdinei, eta horrela aurrerapausoak ematen jarraitzen dute.
Neurketa lasai mantendu da lehen zatian. Donostiarrek baloiaren jabetza mantendu dute eta nafarrak kontraerasoak bilatuz ibili dira. Minutuak pasa ahala hobetuz joan da Óscar Fernandezen taldea eta aukeraren bat edo beste izan dute aurrea hartzeko markagailuan, baina ez dira fin ibili azken metroetan. Gorosabelek aukera izan du gipuzkoarrak markagailuan aurretik jartzeko, baina bere burukada kanpora joan da gutxigatik eta norgehiagoka hutsean iritsi da atsedenaldira.
Aldageletatik bueltan, txuri-urdinak kanpoko taldea baino gogotsuago atera dira eta aukera arriskutsuak izan ditu lehen gola egiteko. Bigarren zatiaren erdialdean, Astiazaranek lehenengo gola egin du taldeko jokaldi bikain bat aprobetxatuz. Handik gutxira, modu berean iritsi da bigarrena. Partida bideratuta zegoela, Soroetak hirugarrena egin du penaltiz, eta ondoren Enekok Estellako taldearen gola egin du baita hamaika metroetatik ere. Azken minutuetan norgehiagoka lasaitu egin da eta ez da egon gol-aukerarik.
Horrela, gure hirugarren taldeak lehen itzulia itxi zuen modu berean ireki du bigarrena, garaipen batekin. Hiru puntu hauei esker, txuri-urdinak salbazio-postuetatik gertuago daude, eta dagoneko puntu bakar batera dago. Datorren astean SD Ejearen aurka jokatuko dute etxetik kanpo, azken asteetan utzitako sentsazio onak berresteko asmoarekin. Aupa Real!
Fitxa teknikoa:
Real Sociedad C: Zango, Garro, Ropero (kap) (Segurola, min. 50), Díaz de Alda, Olarra, Oleaga, Eceizabarrena, Otadui (Cabo, min. 82), Astiazaran (Arruti, min. 82), G. Gorosabel (H. Rodríguez, min. 74) eta Arenzana (Soroeta, min. 74).
CD Izarra: Aldave, Eneko (kap), Aierdi, Santamaría, Endika, Urko, Cubillas (Grande, min. 78), Hualde (Albizu, min. 78), Díaz (Ruper, min. 68), Arbeloa (Garat, min. 38) eta Iker H. (Hoyos, min. 68).
Golak: 1-0: Astiazaran, min. 66. 2-0: Astiazaran, min. 71. 3-0: Soroeta (pen.), min. 87. 3-1: Eneko (pen.), min. 89.
Epailea: Morato Vega. Txartel horia erakutsi die etxeko Ropero, Olarra eta Garrori eta kanpoko Garat eta Urkori.