Gure hirugarren taldeak hiru eta bat garaitu du CD Teruel Zubietan. Óscar Fernándezen mutilak aurretik jarri dira lehenengo zatian eta sendo mantendu dira bigarrenean hiru puntu oso garrantzitsu lortzeko.
Lehenengo zatia intentsitate handikoa izan da. Bi taldeek bilatu dute aurkariaren porteriara iristea jokaldi azkarrekin eta biek izan dituzte aukera argiak golak sartzeko. Txuri urdinak aurretik jarri dira Hodei Rodríguezek area barruan pase bat jaso, defentsa driblatu eta baloia sarera bidali duenean. Kanpokoek ondo erantzun dute eta gertu izan dute berdinketa. Sanhajik baloi sakona jaso du eta Olasagastiren aurrean gelditu da, baina Roperok jokaldi defentsibo bikaina egin du bere saiakera aldaratzeko. Atsedenaldia iristear zegoenean iritsi da talde donostiarraren bigarren gola. Carrerak baloia lapurtu du eta Otaduiri pasa dio, honek sarera bidali zezan.
Bigarren zatia Teruelen domeinuarekin hasi da. Aragoiko taldea baloiaz jabetu da eta gola bilatu du hasieratik. Olasagastiren atera behin eta berriz hurbildu da, baina ezin izan ditu hurbilketak aukera argietan bihurtu etxeko taldearen lan defentsibo onaren ondorioz. Le Normandek gertu izan du kanpokoen lehenengoa jaurtiketa gurutzatu batean, baina bere saiaketa gutxigatik joan da. Luzapenean iritsi da Teruelen gola, Alomarrek bihurtu duen penalti batean. Hurrengo jokaldian, Olarrak etxekoen hirugarren eta azken gola lortu du kontraeraso azkar batean.
Garaipen oso garrantzitsua talde donostiarrarentzat, sailkapeneko azken postuetatik ateratzen saiatzen ari da eta. Datorren astean CD Alfaro hartuko du Zubietan.
Fitxa teknikoa:
Real Sociedad C: Olasagasti, Garro, Díaz de Alda, Ropero (kap), Olarra, Eceizabarrena, Astiazarán (G. Gorosabel, min. 86), Oleaga (Arruti, min. 74), Otadui (Martín, min. 74), H. Rodríguez (Cabo, min. 63) eta Carrera (Arenzana, min. 63).
CD Teruel: Cortés, Val (Serrano, min. 76), Ayala (Alomar, min. 66), López, Marcé, Marí (kap), Le Normand, Cervera (Fruni, min. 66), Sanhaji (Febas, min. 66), Ruiz (Dufur, min. 76) eta Domínguez.
Golak: 1-0: Rodríguez, min. 15. 2-0: Otadui, min. 44. 2-1: Alomar (pen.), min. 90+3. 3-1: Olarra, min. 90+5.
Epailea: Rodríguez Pérez. Etxeko Oleagari eta kanpoko Val, Marí eta Alomarri erakutsi die txartel horia.