Berriro gurekin

Bi urte luze baino gehiagoren ondoren, Amets Bateko txikiak gurekin dira berriz ere. Joan den astean hasi zen Gipuzkoako ikastetxeetako Lehen Hezkuntzako bosgarren mailako haurrei zuzendutako jarduera klasiko honen hamaseigarren edizioa. Ikasturte honetatik aurrera, eta dauden mugak direla eta, jardueren programa aldatu egin da aurreko urteekin alderatuta. Aurtendik aurrera, ekimenean parte hartzen duten txikiek bertatik bertara ezagutuko dute Reale Arena eta estadioko txoko guztietatik bisita bat izango dute. Ondoren, Antonio Elorza Belodromoan edo Paco Yoldi Kiroldegian ariketa fisikoa egiteko txanda izango da, bazkaldu ondoren Aquariumera edo Eureka Zientzia Museora hurbiltzeko.

Hilabete honetan ikastetxe hauek gozatu dute jardueraz: Zarauzko Salbatore Mitxelena, Orioko Zaragueta Herri Eskola, Donostiako Intxaurrondo Ikastola eta Mundaiz Ikastetxea, Errenteriako Telleri Alde, Errezilgo San Martin Herri Eskola eta Ordiziako Jakintza Ikastola.