Korner, Kultura & Futbol festibala Donostia Kulturak eta Real Sociedad Fundazioak elkarrekin antolatutako jaialdia da. Dagoeneko hiru edizio ditu, eta kulturaren eta futbolaren arteko topagunea da, bai eta biekin zerikusia duten gaien inguruko eztabaida-foroa ere. Hurrengo egunetan, hiru edizio hauetan gozatu ditugun eduki interesgarrienetako batzuk berreskuratuko ditugu.
2019ko otsailaren 8ko ekitaldia
Neskek ere jokatzen dute
Vero Boquete, Aintzane Encinas eta Nahikari Garcia. Emakumezkoen futbolaren hiru aurpegi oso ezagun. Victoria Eugeniako Club Aretoan elkartu ziren hirurak horri buruz hitz egiteko. Olga Viza aritu zen moderatzaile lanetan Korner Festibalaren ekitaldi berri honetan. “Neskek gaur egun emakumezkoen futbolaren erreferentziak dituzte eta horretan asko aldatu gara”, Veroren arabera. Nahikarik berak onartu zuen galiziarra erreferente bezala zuela txikitan eredua jarraitzeko.
Garrantzitsua da, gainera, emakumezkoen futbolak bere balore propioak izatea, Aintzanek zioen bezala, bere ildotik jarraitzeko, konparazioak ez baitira positiboak. Horretarako, “eredu diren pertsonetan erreparatu beharra dago, haien bidea segitzeko”, Nahikariren arabera. Horregatik, osagai guztiak ditugu kirol honi jarraipena eman eta istorio bikainak kontatzeko, Aintzanek zioen bezala. “Batez ere etorkizunera begira, inbertsioa luzerako delako”, amaitu zuen Verok.
Protagonisten hitzak entzun nahi al dituzu? Ez galdu bideoa!